Editorjal
Ħa nkunu sinjal ta’ tama...
Matul din is-Sena Ġubilari aħna msejħa nkunu sinjali tanġibbli ta’ tama għal tant ħutna li qed jgħixu f’kundizzjonijiet ibsin. Se nillimita ruħi għall-aktar sinjali ta’ tama li jolqtuna mill-viċin u li dwarhom nistgħu nwettqu dak li qed jitlob minna l-Papa Franġisku.
Jitlobna nkunu sinjal ta’ tama għall-ħabsin li, imċaħħda mil-libertà, qed iġarrbu kuljum, barra l-ħajja iebsa tal-priġunerija, il-vojt affettiv, ir-restrizzjonijiet imposti fuqhom u nuqqas ta’ rispett.
Sinjali ta’ tama għandhom jiġu offruti lill-morda. It-tbatijiet tagħhom jistgħu jsibu serħan fil-qrubija ta’ persuni li jżuruhom u fl-imħabba li jirċievu. L-opri tal-ħniena huma wkoll opri ta’ tama li jqanqlu fil-qlub sentimenti ta’ gratitudni. U l-gratitudni tilħaq lill-ħaddiema kollha fil-qasam tas-saħħa li, f’kundizzjonijiet diffiċli, iħaddmu l-missjoni tagħhom b’għożża għall-persuni morda u dgħajfa.
Ta’ sinjali ta’ tama għandhom bżonn iż-żgħażagħ. B’xorti ħażina, dawn spiss jaraw jiġġarraf quddiemhom il-ħolm tagħhom. Ma nistgħux niddeluduhom. Fuq l-entużjażmu tagħhom hu msejjes il-ġejjieni. Meta l-futur hu inċert u bla ħolm, meta l-istudju ma joffrix possibbiltajiet, jirriskjaw li jxejnu kull xewqa. L-illużjoni tad-drogi, ir-riskju tat-trasgressjoni u t-tiftix ta’ dak li jtir mar-riħ joħolqu fihom konfużjoni u jaħbu l-ġmiel u s-sens tal-ħajja biex jispiċċaw jiżolqu f’abbissi mudlama li jwassluhom għal ġesti li bihom jeqirdu lilhom infushom. Għalhekk, isostni l-Papa, ħa jkun il-Ġublew fil-Knisja okkażjoni ta’ qabża ’l quddiem għall-ġid tagħhom.
Ma jistgħux jonqsu sinjali ta’ tama għall-migranti li jabbandunaw arthom biex ifittxu ħajja aħjar għalihom infushom u għall-familji tagħhom. Jalla x-xewqat tagħhom ma jiġux fix-xejn minħabba preġudizzji u għeluq. Ħa tkun dejjem il-komunità Nisranija li tiddefendi d-dritt tal-iżjed dgħajfa. Ħa tiftaħ beraħ l-bibien tal-akkoljenza biex lil ħadd qatt ma tonqsu t-tama ta’ ħajja aħjar.
Sinjali ta’ tama jixirqilhom l-anzjani li spiss jgħaddu minn solitudni u sens ta’ abbandun. Li nivvalorizzaw it-teżor li huma, l-esperjenza tagħhom tal-ħajja, l-għerf li huma jġorru u l-kontribut li kapaċi joffru, hu impenn għall-komunità Nisranija u għas-soċjetà ċivili.
Ħsieb partikulari jmur għan-nanniet li jirrappreżentaw it-trasmissjoni tal-fidi u tal-għerf tal-ħajja għall-ġenerazzjonijiet iżgħar. Ħa jkunu mwieżna mill-gratitudni tal-ulied u mill-imħabba tan-neputijiet li jsibu fihom fejn iniżżlu l-għeruq, il-komprensjoni u l-inkuraġġiment.
Tama għall-foqra li spiss m’għandhomx il-meħtieġ biex jgħixu. Quddiem mewġiet ġodda ta’ faqar hemm ir-riskju li jidraw u jirrassenjaw ruħhom. Imma ma nistgħux inwarrbu ħarsitna minn fuq sitwazzjonijiet tant drammatiċi li issa qed narawhom kullimkien. Kuljum niltaqgħu ma’ persuni foqra jew li ftaqru. Spiss ma jkollhomx fejn jgħixu, lanqas l-ikel xieraq għal ġurnata. Ibatu mill-esklużjoni u l-indifferenza ta’ ħafna. Hu skandaluż li, f’dinja mogħnija b’riżorsi enormi, il-foqra huma “l-parti l-kbira”.
Għalhekk, il-Ġublew se jkun Sena kkaratterizzata mit-tama li ma tgħib qatt, dik f’Alla. Ħa tgħinna wkoll insibu mill-ġdid il-fiduċja meħtieġa fil-Knisja u fis-soċjetà, fir-relazzjonijiet bejnietna, fil-promozzjoni tad-dinjità ta’ kull persuna u fir-rispett lejn il-ħolqien. Inħallu t-tama tiġbidna lejha u, permezz tagħna, iddakkar lil dawk kollha li jixtiquha.
Michael Caruana0
reviews
Jekk trid taċċedi għal artikli oħra IRREGISTRA HAWN