Ngħidilkom storja
Il-lampa roża
Sant’Antnin żgur li kien sema’ talbha u sabilha l-oġġett misruq!
Meta daħlu jisirqu lil Peppina hi kienet qegħda tisma’, bħal dejjem, il-Quddiesa tas-sebgħa. Xħin marret id-dar u sabet kullimkien imqalleb tatha rasha. Ma kenitx tiflaħ għall-keded u l-biċċa ħaditha bi kbira wisq.
Il-pulizija ma tantx setgħu jgħinuha għax lanqas il-ġirien ma tawhom daqqa t’id fl-investigazzjoni. Kulħadd qal li ma ra u sema’ xejn. U, povra Peppina, li issa kienet għalqet it-tmenin, bdiet thewden lejl u nhar fuq dik l-imbierka serqa avolja, skont uliedha, kienet xortiha tajba li, dak il-ħin, ma kenitx id-dar għax iffrankat xebgħa tajba mingħand il-ħallelin.
Peppina kellha dispjaċir wieħed biss: li l-lampa żgħira roża, li kienet dejjem tkun fuq il-gradenza tas-salott, issa għebet. Hi għoġbithom lill-ħallelin minn daqs dawk affarijiet? Għaliha kien ikun aħjar kieku ħadulha dak il-vażun tal-Eġizzjani għax xejn ma kellha grazzja miegħu minkejja li kienet sabitlu post fis-salott ukoll biex ma tħallihx magħluq fil-kaxxa. Imma, fl-aħħar, qatgħetha li ma tkomplix tinkwieta minħabba li għall-magħmul mhemmx kunsill!
Għaddew ix-xhur u Peppina inzertat kienet il-Belt qegħda tagħmel ix-xiri tal-Milied. F’waħda mill-vetrini tar-regettiera lemħet lampa roża pariġġ dik li serqulha. Wiċċha xegħel u tfaċċat tbissima fuq fommha. Megħluba mill-kurżità, Peppina daħlet fil-ħanut u staqsiet lir-regettier għaliha. Malli ratha mill-qrib malajr indunat li dik il-lampa tabilħaqq kienet tagħha. It-tabella żgħira bajda kienet għadha mwaħħla fuq in-naħa ta’ wara tal-lampa u kienet tgħid hekk: “Lill-għażiża Peppina, mingħand oħtok Vanna”.
F’daqqa waħda għajnejn Peppina mtlew bid-dmugħ u stqarret mar-regettier kif dik il-lampa, li għaliha kellha valur sentimentali kbir, kienet insterqet mingħandha xi xhur qabel. Ma naqsitx ukoll milli turih dik it-tabella b’isimha mniżżel fuqha biex iktar jemminha.
Ir-regettier ħass ferm għaliha meta sema’ l-istorja kollha u aċċertaha li ma kienx jaf li dik il-lampa kienet misruqa għax min tahielu qallu li kien xtraha minn irkant u m’għoġbitux.
Dik il-ħarsa ġenwina f’għajnejn ix-xwejħa kienet tassew ġabitlu ħniena u, bla telf ta’ żmien, qabad il-lampa, għamilhielha f’basket u newwilhielha.
“Ħudha miegħek, Sinjura”, qalilha kollu ħlewwa. “U tagħtini xejn tagħha għax dik tiegħek bi dritt”.
Peppina tgħidx kemm damet tirringrazzjah daqskemm ħadet gost li kien tahielha lura minn jeddu mingħajr ma talabha flus u kieku setgħet kienet tgħannqu magħha.
Dak il-Milied Peppina kienet ferħana mill-ġdid għax il-lampa kienet reġgħet ġiet għandha bla ħsieb. Sant’Antnin żgur li kien sema’ talbha u sabilha l-oġġett misruq!
Charmaine Tanti0
reviews