Sant’Antnin ta’ Padova
Kliem li tisimgħu
“Antonju qam jitkellem b’mod sempliċi. Il-patrijiet, milqutin minn ammirazzjoni kbira, kienu attenti sew għal dak li kien jgħid. L-istagħġib żdied minħabba l-profondità ta’ kliemu, iżda ukoll għall-ispirtu li bih kien jitkellem u għall-karità mħeġġa li kellu” – Ħajja Assidwa, 8
Meta wieħed jgħid li persuna taf titkellem b’mod perswasiv tkun qed tgħid li ma jintilifx f’ħafna tidwir ta’ kliem, ma jtawwalx u ma jużax diskors astratt. Tliet affarijiet li jġiegħlu lil dak li jkun jiddejjaq u jitlef l-attenzjoni. Bil-kuntarju, meta kien jitkellem Sant’Antnin, kelmtu kienet meqjusa u qawwija mimlija ‘spirtu’ u ‘karità’ kif hu deskritt hawn fuq b’riferenza għal meta kien qed jipprietka ġewwa Forlì. Il-qawwa tad-diskors timxi id f’id mal-attenzjoni biex wieħed ma jintilifx f’ħafna dawrin ta’ kliem. Sant’Antnin kien joqgħod attent li jżomm l-attenzjoni ta’ min ikun qed jisimgħu u hekk il-messaġġ li kellu jwassal kien jilħaq mhux biss il-widnejn, iżda wkoll il-qalb ta’ min jisimgħu.
Li wieħed jitkellem b’mod kumplikat hu virus ieħor ta’ daż-żmien. Meta kien jitkellem Sant’Antnin kelmtu kienet mimlija ‘spirtu’ bil-s żgħira għax mhux dejjem jeħtieġ li nitolbu l-Ispirtu s-Santu jkun magħna, iżda hu neċessarju li l-kliem dejjem ikun tagħna mimli esperjenza personali li wieħed ikun jista’ jaqsam mal-oħrajn. Dak li ngħaddu minnu, in-nies li niltaqgħu magħhom u l-ferħ u n-niket li nġarrbu, iridu jagħmlu parti mid-diskors tagħna. Fl-aħħar mill-aħħar anki l-Ispirtu ta’ Alla jaħdem hekk: jieħu ġisem, jitlaħħam u jsir ħaġa waħda mal-qalb. Sant’Antnin kien jitkellem ukoll bil-karità, anzi b’karità ‘mħeġġa’. Hu kien iqajjem l-interess f’min jisimgħu għax kien konkret. Il-karità hi filfatt dik il-ħaġa li biha int tinħakem u tikkonvolġi ruħek.
Il-qaddis ta’ Padova meta kien jitkellem kien tassew joħroġ minnu nnifsu għall-vantaġġ ta’ dawk li jisimgħuh waqt li jħalli sinjali konkreti, jibdel il-ħajjiet u jwelled fin-nies ix-xewqa li jibdew mill-ġdid mimlija kuraġġ.
Mela ejjew, filwaqt li ngħożżu t-tagħlim ta’ Sant’Antnin, anki aħna noqogħdu attenti għall-mod kif nitkellmu u kif inwasslu l-aħbar t-tajba tal-Vanġelu lill-oħrajn. Kif jgħidilna San Franġisk fit-Twissijiet, fil-predikazzjoni tagħna kliemna għandu jkun ftit u meqjusa. Għax hemm ħafna kliem li minħabba l-mod li jingħaqad ma’ nisimgħuhx!
Philip Bonello0
reviews